Bay,
Asa man na nato mabasa?
Gikan pa lang ko sa Mati, Davao. Usa ka adlaw nga biyahi gikan sa Cagayan agi sa Bukidnon ug Davao. Apan dili laay tungod kay nindot sud-ongon ang matahom nga kabukiran, morag mihadla sila sa akong galamhan, daw sa nalipay sab sila nga akong gisud-ong...presko nga hangin nga may dalang gabon...nindot iginhawa og lawom didto sa kinapusongan sa bukid, daw sa nag-imbitar sila nga akong ibuga ang mga aso sa siyudad gikan sa akong gininhawa aron ilang pulihan sa presko nga hangin... nindot kaayo nga tan-awon ang nagpabantang nga banog daw sa nagpalaway sa iyang pagkagawasnon.. apan nakapangutana ako, hangtod kanus-a ang iyang kagawasan kay nasayod ko nga aduna nay nagpasiplat nga mga mata nga gusto mosakmit kaniya...
Nindot ang panagtagbo sa Mati Bay Akoy, ubay-ubay ming nagtagbo didto aron sa pagkaplag og mga pamaagi sa pagpalambo sa relasyon sa mga 'tawo' nga taga-Mindanao ug aron sa paghisgothisgot sa kalambuan sa atong pulo. Usa ka adlaw nga panagtigum og mipanaw na usab ako balik sa Cagayan, adlaw sa gugma sa dihang diha na usab ako sa dalan. Dihay akong nasiplatan nga mang-uyab nga nagpabantang sa may bungtod nga naghangad sa haring adlaw sa iyang dayong pagsalop. Nindot kaayo ang maong eksina. Daw sa gihilap ang akong kasingkasing sa tumang kalipay tungod sa duha ka nilalang nga nagsalo sa ilang gugma nga daw gibindisyonan sa hapit na mahikatulog nga Haring adlaw.
Daghan kog namatikdan nga mga halapad nga mga tanum sa humay, tubo, penya, saging... pangutana sa akong kaugalingon... kinsa kahay makabenipisyo niining mga tanuma? Apan natugaw ang akong pamalandong sa dihang adunay duha ka bata nga nagwarawara daplin sa dalan, bisan ug sila bulingot apan limpiyo kaayo ang ilang mga pahiyom nga mitimbaya sa among pag-agi sa ilang lugar...inosenting kalipay ilang gipadayag kanamo nga mga estranhero... pagkanindot nga bation... sila naghatag kanako ug kadasig sa pagpadayon sa pagpanday sa nindot nga ugma bisan pa sa mga unos sa kalisdanan nga atong gisagubang sa kasamtangang panahon.
Totoy
Posts
Bay Totoy,
ReplyDeleteMay adlaw gihapon nga moabot,
nga ang atong lasang molunhaw ug molipang, nga ikapanghinambog sa banog ang iyang katahoman ug kagawasan. Padayon lang ta sa pagtanom sa mga binhi sa paglaom,gani ang mga batang gawarawara, makita sa ilang mga mata, ang ugma, nga gapanghitabo na karon. Gawasnon nga paglaom!
Kahimuot sa kalipay sa uban! Kahimuot nga gasud-ong sa duha ka binuhat nga malimtanon sa tanan gawas sa pagsalop sa adlaw nga nagbalon sa ilang gisaw-an nga pagpangga sa adlaw sa kasingkasing.Bisan gani ang mga tanom ug kakahoyan, nakighadla, nahimuot usab sa imong pagsud-ong, sa imong mga panan-aw nga tugob sa paghigugma ug paglaom. Nakig-uban sila sa imong pagbati, sama ra nga ang imong pagpamasin mao poy kabalaka sa banog. Nahiusa kitang tanan sa kapalaran sa atong Yuta ubos sa gahom ni Haring Adlaw. Hinaot nga sama sa banog,mopadayon kita nga gawasnon sa pagpanaw, sa paghandom og kaugmaon, ug hinaot, mawala ang kabalaka nga basin ang atong kalasangan ug tanaman mahanaw o kaha pahimuslan lamang sa wa nay gugma...Hinaot, nga magpabilin ang atong pahiyom uban sa katahoman sa palibot,ug unta dili masakmit ang tiunay nga paglaom,gugma,katahom,inosenteng kalipay,kagawasan...Hinaot nga kanunay may batoganan ang atong mga pangandoy ug may kapahulayan ang mga pako sa atong pagpanaw...
Akoy